作為本土派，固然會睇唔過眼啲中國遊客嘅無公德行為，但香港人嘅無公德行為，一樣睇唔過眼，因為整污糟香港人嘅聲譽。有件叫 余嘉允 ，自以為係KOL嘅蛋散，近排喺香草航空國內線班機做嘅核突嘢，危害客機乘客安全，簡直係黐線，唔出嚟打佢都唔得。
余嘉允 覺得喺飛機降落果陣用4G live好過癮
大家先睇 tango 嘅post先
全世界嘅飛機喺起飛同降落期間，都唔准使用發射無線電波嘅產品，甚至用電子產品都唔得。我過往喺飛機降落果陣拍空拍照片，係用菲林相機，因為菲林相機嘅基本上唔會造成有可能干擾飛機導航系統嘅無線電波。我寧願成品攞去沖，呢個係我最初保留菲林相機嘅好重要理由嚟。(呢個亦係點解，我係用Sony A7嘅理由，因為鏡頭可以就番菲林機)當然，依家容許唔發射無線電波嘅器材喺起飛同降落期間使用，可以唔駛用到菲林相機。
你依家 余嘉允 夠薑話香草航空有Wifi，飛機有Wifi都好，臨降落都會關閉系統，呢個係普通常識，更何況我未聽過有香草航空有Wifi，依家 余嘉允 呢條友，好明顯係觸犯日本嘅航空法律，呢次喺網上公開丙佢，就已經十分之客氣，如果有人向日本政府舉報，我恐怕佢喺日本都有排煩，因為呢啲飛行安全相關嘅法律，係無任何妥協嘅餘地，畢竟飛機一有任何差池，影響緊係幾百名乘客嘅安全。
依家好多年青人，都以為自己可以做KOL，無錯，做KOL睇落好威，但做KOL係必須承擔番自己嘅言責，更唔係為上位而上位，罔顧飛機上乘客嘅安全。如果要睇降落嘅情況，可以自己用手機拍完，落咗機至上網，有必要做live咩？起飛同降落期間唔係唔可以做live，唯一例外係遇上恐怖分子襲擊，喺幫到執法人員嘅情況下，咁就得，乜你余生架機遇上恐怖分子咩？
呢個係好基本公德問題，唔該你 余嘉允 呢條友自己醒水啲。