រដ្ឋមន្ត្រីក្រសួងបរិស្ថានចង់ឱ្យយុវជនផ្លាស់ប្តូរទម្លាប់ ដើម្បីទប់ស្កាត់ការប្រែប្រួលអាកាសធាតុ
ក្រសួងបរិស្ថាន បានលើកទឹកចិត្ត និងជំរុញដល់យុវជន ឱ្យចូលរួមទប់ស្កាត់ ក្នុងការឆ្លើយតបទៅនឹងការប្រែប្រួលអាកាសធាតុ ដែលកំពុងបង្កផលប៉ះពាល់ដល់សង្គម ដើម្បីធានានិរន្តរភាព បរិស្ថាន ភពផែនដី នាពេលអនាគត។ នេះបើតាមការចុះផ្សាយរបស់សារព័ត៌មានកម្ពុជា។
ការលើកទឹកចិត្តនេះ ធ្វើឡើងនៅក្នុងសិក្ខាសាលាបណ្តុះបណ្តាល ស្តីពីការប្រែប្រួលអាកាសធាតុ សម្រាប់យុវជន នាព្រឹកថ្ងៃទី២៧ ខែមិថុនា ឆ្នាំ២០១៦ នៅសណ្ឋាគារកាំបូឌីយ៉ាណា។ នៅក្នុងសិក្ខាសាលានេះដែរ លោកសាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា រហូតមកដល់ពេលនេះ រាជរដ្ឋាភិបាលចង់ឱ្យយុវជនចូលរួម ក្នុងការផ្លាស់ប្តូរទម្លាប់ក្នុងការរស់នៅ ដូចជាកាត់បន្ថយការបញ្ចេញឧស្ម័នផ្ទះកញ្ចក់ តាមរយៈការប្រើប្រាស់ ដោយសន្សំសំចៃថាមពលអគ្គិសនី នៅគ្រប់ទីកន្លែង ទាំងនៅតាមគេហដ្ឋាន សាលារៀន ជាពិសេសកាត់បន្ថយ ការប្រើប្រាស់ម៉ាស៊ីនត្រជាក់។
រដ្ឋមន្ត្រីក្រសួងបរិស្ថានរូបនេះ បានបញ្ជាក់ថាការចូលរួមទប់ស្កាត់ការប្រែប្រួលអាកាសធាតុគឺជាការចូលរួមដ៏សំខាន់មួយ ខណៈពេលដែលកំណើនកំហាប់ឧស្ម័នផ្ទះកញ្ចក់ នៅក្នុងបរិយាកាស ធ្វើឱ្យមានកំណើនកម្តៅផែនដី ការប្រែប្រួលរបបទឹកភ្លៀង ការកើនឡើងកំពស់នីវ៉ូទឹកសមុទ្រ បញ្ហាខ្វះទឹក គ្រោះរាំងស្ងួត បានជះឥទ្ធិពល ជាអវិជ្ជមានដល់មុខរបរកសិកម្ម និងជីវៈចម្រុះ ដែលគម្រាមកំហែងដល់សុខភាព មនុស្ស សត្វ រុក្ខជាតិ ពិសេសគឺសេដ្ឋកិច្ចជាតិទាំងមូល។
ជាការកត់សម្គាល់ពីមួយឆ្នាំទៅមួយឆ្នាំ គេសង្កេតឃើញថា អាកាសធាតុមានការប្រែប្រួល ដែលនេះជាហេតុធ្វើឲ្យប្រទេសមួយចំនួនមានការព្រួយបារម្ភ ហើយប្រទេសមហាអំណាចមួយចំនួនបានប្តេជា្ញកាត់បន្ថយការប្រើប្រាស់ឧស្ម័នផ្ទះកញ្ចក់ ពីព្រោះឧស្ម័នផ្ទះកញ្ចក់នេះមានកំណើនកំហាប់នៅក្នុងបរិយាកាស ធ្វើឱ្យមានកំណើនកម្តៅផែនដី ដែលជាហេតុធ្វើឲ្យមានការប្រែប្រួលអាកាសធាតុ៕ ដោយ៖សេង បារាំង
ព្រឹក៖ ម៉ោង ៦:០០-៧:០០