假如你買咗 香港航空 機票應該點自保

香港航空-min

雖然 香港航空 或者同集團嘅香港快運果啲騎呢delay早已經唔係新聞,但依家海航集團已經被花旗銀行集團、摩根士丹利同美國銀行三個大集團,提出KYC同債務償還能力嘅疑問,如果你好早買咗佢地嘅機票,又退唔到嘅話,你話你淆唔淆底?咁呢個情況下,你應該點樣自保呢?

買咗 香港航空 機票嘅搵間非中資保險公司買旅遊保

首先,你一定要買定旅遊保險,基本上,你依家訂咗機票果啲,你無得選擇,只可以買旅遊保險,因為依家你完全唔知 香港航空 依家財政狀況係點,當依家海航集團嘅營運係一個謎果陣,喺保險公司未公布唔接受 香港航空 機票持有人投保前投保,就至少可以一旦張機票無咗,保險公司可以賠番張機票俾你,好大機會果張機票嘅價值係貴過 香港航空 機票本身嘅。用百幾蚊賭一鋪兼保障自己,係抵到極嘅。

但係,你一定要搵間非中資保險公司,因為中資保險公司,有機會受到海航集團一旦出現嘅問題牽連,屆時你真係見財化水中嘅見財化水,如果係華資保險公司,亦唔好同東亞銀行集團有關,因為東亞銀行係海航集團嘅主要債權銀行之一,呢個世界邊有你賭海航集團出事果陣,走去落重注買海航集團無事嘅銀行買保險嘅概念?簡單嚟講,外資保險公司會比較大機會唔會受到海航集團出事呢個問題波及嘅。

當然,你book酒店果陣,最好避開果啲海航集團有關嘅集團,好似Carlson Hotels,基本上係要全線避開,因為一旦海航集團有乜冬瓜豆腐,喺海外搞到in administration,如果保證有得住就話,無得住豈不是真係中伏,當然,好多人都應該無咁早訂酒店,但如果你訂咗海航集團相關酒店集團嘅酒店,你買定旅遊保險都應該無衰仔。大家要記住,海航集團收購咗好多嘢嘅,一旦爆起嚟,都唔會係人咁品,所以你買旅遊保險,都應該係無死錯人嘅。

你以為支爆唔會影響你遊山玩水,朋友,你真係太天真喇,不過依家趁旅遊保險仲要投保寬鬆果陣,你買咗旅遊保險嘅,都應該唔會太大損失,俾果少少錢可以買個安心,都唔駛咁驚嘅。

2 thoughts on “假如你買咗 香港航空 機票應該點自保

  1. 您好!我依家真係心驚驚呀!
    我響年頭已經買左今年年尾連元旦東京機票,當時見價錢幾抵。。我但旅遊保險通常只有出發前90天才可以買,我現在可以點做呢?謝謝!

    1. 唔好意思,補充少少。我係買左香港來回東京機票,搭香港航空。酒店今次諗住好少少,對於我地嚟講已經貴左啲,亦都已經fully paid。

發佈留言

發佈留言必須填寫的電子郵件地址不會公開。 必填欄位標示為 *