依家 發叔 等緊你班原居民

發叔-min

因等埋 發叔 事件食咗隻大死貓,而永久留名嘅劉皇發,終於喺八號風球嚟緊果陣走埋。土共一定話到佢好有貢獻,但我睇, 發叔 除咗喺政改表決食咗隻死貓值得同情外(根本成單嘢係張曉明指揮失誤,關 發叔 叉事咩),我只能講,劉皇發等緊你班原居民一齊,送入歷史嘅垃圾堆。

發叔 係維護一啲土豪權益

一般其他國家嘅原居民政策,甚至本來香港嘅原居民政策都係,目標除咗係作為入侵者對原居民嘅補償,以及政治安撫手段外,亦係為咗保留原居民嘅生活方式同文化。但依家大家同我講,歧視女性嘅丁屋政策,保留咗乜嘢值得保留嘅文化,除咗俾人攞嚟炒地皮,仲要係少部分本身有農地嘅大家族攞嚟炒地皮,有乜用?傳統嘅客家文化,你班「原居民」有做過任何嘢咩?你班友有推廣過新界嘅傳統風俗同文化咩?林村河果個「天安門」我就聽過,都未計對新界農地同鄉郊地區嘅嚴重破壞,所以你話 發叔 對新界原居民有乜貢獻,除咗令一班友齊齊發達之外,我真係睇唔到當中嘅貢獻,相反,令市區嘅民眾更加憎惡新界原居民,決心要結束任何原居民嘅特權。

以族群同文化保育角度,我贊成要對傳統客家文化作出有系統研究同保育,甚至應該成立一個基金同組織,協助唔同嘅新界村落保護文化,同埋保護被稱為風水林嘅新界林地,以及唔少仲有耕種能力嘅農地。我甚至認為,因應國家安全需要(我對香港本身嘅國家安全),對新界農民作出農業補貼。但依家所謂嘅原居民權益,絕對只係大地主用嚟炒地皮用,完全唔係果回事,所以 發叔 對香港嘅功過,絕對係過遠大於過,甚至唔少當時訂出新界原居民權益政策嘅英國官員,佢地嘅責任都係要計清計楚。

當然, 發叔 留低嘅政治遺產可以食幾耐,我睇未必食得好耐,一方面,共產黨遲早會清算呢批土豪,換上中國果啲共產黨入侵者利益,畢竟中國人係無利益共享呢個概念,同英國人管治殖民地嘅哲學係好唔同,另一方面,如果中共倒台,換上係香港人為主嘅新政府,過去咁多年「原居民」嘅表現,你覺得香港人會放過呢班港奸,我睇唔多會囉。所以, 發叔 等緊佢地。

發佈留言

發佈留言必須填寫的電子郵件地址不會公開。 必填欄位標示為 *