មន្ទីរធនធានទឹកប្រកាសឲ្យសមត្ថកិច្ចចាប់ខ្លួនtommy angkor ពីបទបរិហាកេរ្តិ៍
គណនី Facebook Tommy Angkor II ដែលបានផ្សព្វផ្សាយថា អាងកំពីងពួយត្រូវបានរាជរដ្ឋាភិបាល កម្ពុជា លក់ឱ្យផ្នែកឯកជន ៩៩ឆ្នាំនោះ ត្រូវបានមន្ទីរធនធានទឹកខេត្តបាត់ដំបងប្រកាស ឲ្យសមត្ថកិច្ចស្វែ ងរកចាប់ខ្លួនមកផ្តន្ទាទោស ដោយចោទថា ជននេះបំភ្លៃការពិតបោកប្រាស់មតិសាធារណៈ។
មន្ទីរធនធានទឹកខេត្តបាត់ដំបង បានដាក់លិខិតជូនស្នងការនគបាលខេត្តស្នើសុំ ជួយស្វែងរកជន បរិ ហារកេរ្តិ៍រឿងលក់អាងកំពីងពួយ៩៩ឆ្នាំ។បើតាមលិខិតដាក់ជូនស្នងការនគបាលខេត្ត ជនដែលគេចោទ ថាជាអ្នកបរិហាកេរ្តិ៍ មានឈ្មោះនៅក្នុងគណនី Facebook ថាTommy Angkor II បានផ្សព្វផ្សាយថា អាងកំពីងពួយត្រូវបានរាជរដ្ឋាភិបាលកម្ពុជា លក់ឱ្យផ្នែកឯកជន ៩៩ឆ្នាំ ក្នុងលេសសម្បទាន។
តាមលិខិតរបស់មន្ទីរធនធានទឹក លេខ១៣៤មចទឧ.បប ចុះថ្ងៃទី២៣ ឧសភា ឆ្នាំ២០១៦ បាន ចាត់ទុកការលើកឡើងនេះ គឺធ្វើឱ្យប៉ះពាល់ធ្ងន់ធ្ងរដល់កិត្តិយសនិងសេចក្តីថ្លៃថ្នូរ របស់រាជរដ្ឋាភិបាលកម្ពុជា។
ក្នុងលិខិតបញ្ជាក់ថា កន្លងមករាជរដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយម ដែលជាសេនាធិការ បានខិតខំប្រឹងប្រែងអស់ពីកម្លាំងកាយចិត្ត ក្នុងការអនុវត្ត និងស្តារឡើងវិញនូវហេដ្ឋារចនាសម្ព័ន្ធ ប្រព័ន្ធធារាសាស្រ្ត យ៉ាងច្រើនក្នុងខេត្ត និងទូទាំងប្រទេសក្នុងគោលបំណងដើម្បីលើកស្ទួយ និងកាត់បន្ថយនូវភាពក្រីក្ររបស់ប្រជាពលរដ្ឋ ។ដោយឡែកអាងកំពីងពួយក្រោយពី ទទួលរងការខូចខាតយ៉ាងដំណំដោយទឹកជំនន់ឆ្នាំ២០១៣ ក៏ត្រូវបានក្រសួងធនធានទឹក និងឧតុនិយម បានជួសជុលស្តារឡើងវិញ ហើយបច្ចុប្បន្នអាងនេះ បានដើរតួនាទីយ៉ាងសំខាន់ ក្នុងការផ្តល់ទឹកដល់ប្រជាពលរដ្ឋ។
មន្ទីរធនធានទឹកខេត្តបាត់ដំបងបានសម្តែងការសោកស្តាយចំពោះគណនី Facebook Tommy Angkor II ដែលបានបំភ្លៃការពិត បោកប្រាស់មតិសាធារណៈយ៉ាងដូច្នេះ។ហើយសូមឲ្យស្នងការនគបាលខេត្តចាត់វិធានការ ស្វែងរកជនខាងលើនេះមកផ្តន្ទាទោសច្បាប់។
យ៉ាងណារហូតមកដល់ថ្ងៃទី២៥ ឧសភានេះ នៅមិនទាន់មានតម្រុយពីសម្ថកិច្ចខេត្តបាត់ដំបង ពាក់ព័ន្ឋនឹងម្ចាស់គណនី Tommy Angkor II នេះ នៅឡើយទេ៕ដោយ៖ខាត់ សុធី
ព្រឹក៖ ម៉ោង ៦:០០-៧:០០