香港啲環保塔利班，有時真係十分之難頂，喺 垃圾徵費 問題上就尤其明顯。地球之友嘅朱漢強話， 垃圾徵費 水平同南韓、台灣差唔多，係中產負擔得起嘅，所以唔會係問題，呢啲友仔為咗「環保」，政府嘅措施幾白痴都撐，上次停車熄匙係咁，今次 垃圾徵費 都係咁，十分之難頂。
垃圾徵費 係雙重課稅
台灣同南韓可以行 垃圾徵費 嘅大背景係台灣同南韓無類似差餉，或者市鎮理事稅之類嘅嘢，所以清理垃圾由一般人稅收支付，唔係用者自付，本身就唔公義，所以就隨袋徵收費用，並且有大規模嘅垃圾分類系統配合。願意做好垃圾分類嘅人，就有俾少啲垃圾袋費嘅「回報」，唔願意嘅，就要俾多啲錢自己買膠袋。喺台灣同南韓嘅處境， 垃圾徵費 係合理而最少交易成本嘅做法，至少行政費用係唔貴嘅。
但香港唔係呢個情況，香港市政局前身係潔淨局，用嚟支付潔淨局費用叫差餉，實際上，差餉唔係去咗差佬袋，係用嚟清潔城市，即係 垃圾徵費 ，除非依家即刻廢咗差餉，改行台灣、南韓模式嘅隨袋徵收，用者自付制度，否則就係雙重課稅，我明明俾咗垃圾清理費用，點解要我俾多次先，成件事變得十分之唔合理。呢班環保塔利班，究竟仲有無課稅公義嘅問題，仲未計呢類同收入無關嘅間接稅，係根本累退稅制，對基層完全唔公平。
香港嘅環保膠之所以乞人憎，因為佢地為咗所謂「環保」，完全漠視政策內容本身合唔合理，變咗類似禮教殺人嘅情況，好似上次停車熄匙，點解被人鬧爆，因為停車熄匙無適當豁免嘅情況下，一係搞到有司機熱死，一係就搞到啲車為咗迴避停車熄匙法律，喺條街係咁遊蕩，排嘅廢你仲多。當然依家政府唔執法攞嚟對付啲老闆車，以及成班老闆車買咗Tesla，搞到奉旨喺條街開住冷氣係泊都無問題，呢個就已經係後話。
香港環保人士要爭取市民支持，唔係被人認為係膠，應該要審視政府提出環保政策嘅合理性，好似 垃圾徵費 撐嚟做乜，環保團體如果係堅做嘢，唔係應該更加要大力反對政府發展郊野公園呢件事，呢個真係可能造成生態浩劫，香港環保膠，講到尾問題就係不分輕重。