請做編輯小心content farm嘅 假新聞

呢個假期，有單好膠嘅 假新聞 ，香港、大馬、台灣啲傳媒傳個不亦樂乎，完全係黐線，啲友仔集體中伏乜都唔知。呢件事，簡直係香港傳媒嘅反面教材，唔該各位編輯，對content farm嘅假新聞尤其要小心，因為一單膠聞可以令你個傳媒被人笑足一世。

假新聞 唔可以當係source嚟報

話說呢個假期，有單好膠嘅 假新聞 ，一名新加坡女人，佢喺沙灘裸體曬太陽果陣，下陰被螃蟹誤會係蠔，所以被夾到，跟住佢嘅朋友，仲走去吸佢下體。我唔係話南洋唔會出現呢啲膠聞，但如果有呢單膠聞真係入咗醫院，至少新加坡報業控股旗下嘅中文報章，例如《聯合晚報》或者《新明日報》會報，因為呢兩份嘢係行相對嚟講嘅小報路線。就算SPH唔肯報，新加坡都有相對有江湖地位嘅網媒，例如mothership.sg，或者independent.sg，甚至hardware zone都會講，hardware zone話係新加坡高登，但SPH係有份，SPH唔會容許一啲大亂嚟嘅嘢出街。

但依家出自一個 Sunday Register嘅網站，仲要呢個聲稱新加坡嘅網站，事實上WHOIS係南非佬註冊，你應該估到係乜事，就係content farm嘅 假新聞 。而《中國報》班友不求甚解，亂登一通都算，最仆街係，Changi Beach係樟宜都唔識，我好懷疑《中國報》嘅編輯係咪搬咗去中國，因為南洋人，或者香港人，都知道Changi即係樟宜。跟住《壹週刊》、以至一大堆台灣傳媒不求甚解，照炒《中國報》嘅新聞，搞出n車連環相撞，我呢個南洋人睇完真係笑咗。一單唔合乎常識嘅 假新聞 ，因此喺中文傳媒亂走一通，反映中文傳媒做外電班友，究竟係乜水平。

當然，有一個聲稱打 假新聞 嘅facebook page，完全唔敢提呢件事，果間嘢叫求驗傳媒，因為求驗傳媒係明報班友做，明報喺大馬嘅兄弟公司膠咗，你覺得求驗傳媒敢講？有時候，明報中人呢啲岳不群作風十分之乞人憎，大家明點解我對求驗傳媒呢個page係採取一個不齒嘅態度，有啲嘢真係一睇就現形。