សម្លេងម្ចាស់ឆ្នោត​កម្ពុជា

យោងតាមគេហទំព័រវីអូឌីដែលបានចេញផ្សាយនាព្រឹកនេះបានឲ្យដឹងថា អាជ្ញាធរបិទផ្លូវជុំវិញសាលាដំបូងរាជធានីភ្នំពេញ នៅព្រឹកព្រលឹមថ្ងៃសុក្រនេះ ខណៈដែលតុលាការ បើកសវនាការជំនុំជម្រះក្តី លើសំណុំរឿងលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងជនជាប់ចោទ ២២រូបទៀត ដែលត្រូវបានចាប់ខ្លួនក្នុងហេតុការណ៍ប៉ះទង្គិចរវាងសមត្ថកិច្ច និងកម្មករ កាលពីដើមខែមករា កន្លងទៅនេះ។

កម្លាំងសមត្ថកិច្ចប្រដាប់ដោយខែល និងដំបង រាប់រយនាក់ បានដាក់របាំងបិទផ្លូវជាច្រើនជាន់ ចាប់ពីស្តុបក្បែរផ្សារស៊ីធីម៉ល រហូតដល់នាងគង្ហីង ដោយមិនអនុញ្ញាតឲ្យនណារម្នាក់ចូលទៅក្បែរឡើយ។
នៅក្បែររង្វង់មូលនាងគង្ហីង និងជិតស្ថានីយ៍ប្រេងឥន្ទនៈក្បែរស្តុបអាងទឹកអូឡាំពិកនោះ ឯណោះវិញ មានបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិសកម្មជនដីធ្លី កម្មករ មន្ត្រីសហជីព

សមាជិកសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងប្រជាពលរដ្ឋ ជាច្រើនរយនាក់ បានប្រមូលផ្តុំគ្នានៅទីនោះ ហើយបានស្រែកទាមទារឲ្យដោះលែងជនជាប់ចោទទាំង២៣នាក់នោះ ដោយគ្មានលក្ខខណ្ឌ។
មានប្រជាពលរដ្ឋមួយចំនួន ក៏បានធ្វើពិធីអុជធូបបួងសួង ដោយមានសំណែន ក្បាលជូ្រក មាន់ ទា និងរៀបចំបាយសីផងដែរ។

បើតាមមេធាវីលោកវន់ ពៅ គឺលោក សំ សុខគង់ សវនាការអ្នកទាំង២៣នាក់នេះ ត្រូវបានបែកចែកជា បីផ្នែក ក្នុងនោះសវនការចំនួនពីរ នឹងបើកលើករណីមនុស្ស១០នាក់ ដែលត្រូវបានចាប់ខ្លួន នៅក្នុងហេតុការណ៍ប៉ះទង្គិចខាងមុខរោងចក្រយ៉ាកជីង និងសវនាការមួយទៀត នឹងបើកលើករណីកម្មករ១៣នាក់ ដែលត្រូវបានចាប់ខ្លួននៅក្នុងការប៉ះទង្គិចលើផ្លូវវ៉េងស្រេង។

ជនជាប់ចោទទាំង២៣នាក់នោះ រងចោទពីបទ ហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ ក្នុងនោះកម្មករម្នាក់ដែលជាប់ឃុំ និងពីរនាក់ ដែលត្រូវបានដោះលែងនៅក្រៅឃុំបណ្តោះអាសន្ន កាលពីថ្ងៃទី៨ ខែកុម្ភៈ ត្រូវបានចោទប្រកាន់ថែមពីរករណីទៀត ពីបទប្រមាថមន្ត្រីសាធារណៈ និងបង្កឲ្យខូចសណ្តាប់ធ្នាប់សាធារណៈ៕