TSA 係咪張曉明搵銀圖謀嚟㗎

TSA 本來係民生問題，本來唔應該搞到好政治化，因為只不過係一個test，當然涉及殺校，但我估殺校係唔會搞到本來同一黨嘅新舊特首互片。但依家 TSA 問題，林鄭月娥竟然同吳克儉起衝突，件事好奇怪。因為依家係過渡政府，如果吳克儉仲想留喺新政府，係應該儘量同新政府合作，方便林鄭月娥喺 TSA 攞民望，一個民望低成咁嘅特首，如果可以喺 TSA 攞分，做到薯片政綱一啲嘢，其實理論上，對挽救依家個政制嘅支持度，都有少少用。

TSA 係殺人武器

但依家 TSA 寸步不讓嘅態度，我覺得好奇怪，除咗梁振英心理變態外，應該好明顯係中聯辦介入，所以 TSA 問題上，梁振英死都要搞埋今年嘅 TSA ，咁問題係，乜事要一定搞埋今年 TSA ，唯一解釋係中聯辦嘅主要小金庫來源：三中商。

首先，商務印書館(香港)依家係香港主要嘅課本零售商，如果取消咗今年 TSA ，咁好多家長會唔買果啲mock paper嘅存貨，商務印書館同三聯書店就會蒙受好大損失，因政策改變而變死貨，唔通張曉明走去同牛津大學出版社，Pearson呢啲外資大公司開拖，屆時我真係留名等睇笑話。更何況，中聯辦自己都有出課本，果間出版社叫香港教育圖書有限公司，香港教育圖書有限公司出咗TSa練習咁多，唔通又係叫張曉明同埋中聯辦一眾官員全部食晒落肚，以依家回收業咁不振，其實果啲TSA練習只能夠當廢紙處理。所以，張曉明呢啲人渣為咗銷晒啲存貨，就迫吳克儉死人都要頂埋今年嘅TSA佢，我懷疑喺中聯辦都有龐大利益嘅情況下，林鄭月娥有無可能取消TSa都係一個問題，當中聯辦自己都下海經商果陣，政府好多奇怪政策嘅推行，其實都係同中聯辦嘅荷包有關，而唔係同香港市民嘅福祉有關。

所以，中聯辦最好向公眾交代清楚，聯合出版集團喺TSa問題上，涉及有幾龐大嘅商業利益。甚至我懷疑國民教育呢檔嘢，都係生意多過政治，因為保證課本一定愛國，只能向香港教育圖書買，屆時仲唔發過豬頭丙。我只能講，中聯辦呢個部門，真係香港腐敗嘅來源，一定要清除。