時區 嘅政治

台灣有人聯署，要求台灣改用日韓一致嘅 時區 (UTC+9) ，引起討論，當然呢個議題好政治性，因為涉及去中國化嘅問題。只不過，如果我係中國，倒不如自己都乘機重新劃分 時區 ，全中國同單一時區呢樣嘢既唔科學，亦十分之擾民。

時區 單一就代表國家統一？

時區 單一，當然喺商業貿易上或容有便利，好似歐洲絕大部分歐元區成員都採用歐洲中部時區(Central European Time, UTC+1)，但唔代表歐元區一定要用UTC+1，事實上，葡萄牙今日嘅時間仍然係跟英國，即係UTC+0, 或者俗稱嘅GMT。由夏令時間呢種本來用於戰時日光節約嘅做法，大家可以睇到， 時區 嘅合理運用係睇日出日落時間，唔係政治上亂劃時區，否則得個膠字。世界有兩個退聯國家，就係玩啲咁嘅膠嘢。一個叫西班牙，一個叫中國。

先講西班牙，西班牙用UTC+1時區，但係大家睇地圖都知，西班牙實際上應該跟英國同葡萄牙用UTC，但如果西班牙用UTC，直布羅陀都會變英國時間，因為直布羅陀喺關卡運作需要問題，西班牙乜時區佢都要跟，結果件事十分之硬膠，西班牙故意用UTC+1，之後西班牙全國返工時間都係遲一個鐘，例如早上九點半至返工，因為個 時區 係膠嘅。而中國係另一個膠地區，好似東突呢啲地方，其實應該用UTC+6，北京本身由於高緯度，其實係用UTC+7比較著數，而中國東北，有部分地區其實要跟日韓行UTC+9，或跟北韓行UTC+8.5，但為咗全國統一嘛，結果用晒香港標準時間，即係UTC+8，當中嘅混亂可想而知。

所以台灣人打算自決 時區 ，雖然有啲人認為台灣應保留UTC+8，因為日治年代初期，台灣同宮古群島，八重山群島等都列入西部標準時，而西部標準時就係 UTC+8，1937年開始戰爭越嚟越緊張，而連台灣一併納入中央標準時，即係UTC+9，甚至香港日治年代都係UTC+9添。但其實台灣同宮古群島等位置尷尬，其實要鬥準確，UTC +8.5嘅北韓時間最好(北韓人係因打仗關係，時區係會校到好盡節省資源)，只不過，台灣如果想擺脫果啲愛好打飛機嘅中國人，其實改UTC+9都未必係壞事。