越嚟越有理由相信，中國打算喺西九龍站 一地兩檢 問題上霸王硬上弓，總之唔理三七二十一，強行要香港割地，方便班中國人喺香港搞免水洗頭艇，要擄走香港人更加容易，只要夾得啱高鐵班次，仲容易過受國際監管嘅香港機場airside太多。
一地兩檢 喺香港唔會成功
雖然依家新加坡Woodland CIQ，名義上都係新加坡國土上出現馬來西亞一地兩檢，只不過，由於馬來西亞唔係完全實施一地兩檢，馬來西亞出境旅客喺新山中央車站出境嘅，因為新加坡嘅旅客，依家唔可以坐同一架列車由新加坡坐到吉隆坡，所以新加坡果個一地兩檢廢咗武功，剩番有類近安排，已經係英國、法國、比利時之間，就Eurostar列車入境安排作出嘅特殊處理，因為理論上，英國唔係神根區，有自己嘅邊境政策，所以必須喺法國巴黎同比利時布魯塞爾嘅火車站設邊防關卡，同樣嘅法國亦會在倫敦嘅火車站設邊防關卡。
只不過，英、法、比三國可以咁玩，因為英、法、比三國都係歐盟成員國，根本佢地自己啲國民都可以喺對方領土無限期逗留(居歐權是也)，而且三個國家，都係受同一套《歐洲人權公約》，以及歐洲法庭所規管，咁一地n檢，點玩都得喇。但中國係一個唔尊重基本人權嘅惡棍國家，依家銅鑼灣書院桂民海同李波條數都未找，講乜嘢一地兩檢，任何中國執法人員喺香港土地上執行職務，都係極其令人不安嘅安排。如果B2, B3, B4層無法通往香港，還好，但如果有通道可以通往香港，例如停車場可以繞過香港邊防入去，或者香港入境處啲人做賣港賊，任由中國啲人亂嚟嘅話，大家可以諗到將會有乜事發生。要擄走李波，都可以用大飛截到，如果依家要擄走香港要人，只要校啱高鐵班次，然後用停車場塞果條友上高鐵列車，到時想停都無得停，根本救唔番。
所以 一地兩檢 根本唔會成功，因為香港同中國喺價值觀上分歧，仲遠大過新加坡同馬來西亞，硬上 一地兩檢 ，只會令香港人更反感，梁愛詩呢個老妖，啲妖言惑眾都預咗，不過連湯家驊都越唔越不知所謂，果然十一哥係名不虛傳。