រកឃើញឈើលេខ១រាប់ពាន់សន្លឹក នៅក្នុងសមាគមន៍វៀតណាម
ខេត្តសៀមរាប៖សមត្ថកិច្ចចម្រុះនៃស្នងការនគរបាលខេត្ដសៀមរាប រកឃើញឈើលេខ១ជិត២៥ម៉ែត្រគូប ខណៈក្រុមជាងវៀតណាមជិត១០នាក់ កំពុងកែច្នៃឈើទាំងនោះ
ខេត្តសៀមរាប៖សមត្ថកិច្ចចម្រុះនៃស្នងការនគរបាលខេត្ដសៀមរាប រកឃើញឈើលេខ១ជិត២៥ម៉ែត្រគូប ខណៈក្រុមជាងវៀតណាមជិត១០នាក់ កំពុងកែច្នៃឈើទាំងនោះ
ខេត្តសៀមរាប៖សមត្ថកិច្ចចម្រុះនៃស្នងការនគរបាលខេត្ដសៀមរាប រកឃើញឈើលេខ១ជិត២៥ម៉ែត្រគូប ខណៈក្រុមជាងវៀតណាមជិត១០នាក់ កំពុងកែច្នៃឈើទាំងនោះជាគ្រឿងសឹង្ហារឹម នៅក្នុងសមាគមន៍សហព័ន្ធខ្មែរ វៀតណាមនៅក្នុងក្រុងទេសចរណ៍សៀមរាបមួយនេះមិនប្រក្រតី រួចដកកម្លាំងចេញអស់ ខណៈពេលដែលមន្ត្រីជំនាញរដ្ឋបាលព្រៃឈើ បានយកច្បាប់មកឱ្យមើល គេដាក់ការសង្ស័យត្រូវថ្នាំពីម្ចាស់សមាគមន៍។
ហេតុការចុះប្រតិបត្ដិការបង្ក្រាបទីតាំងខាងលើនេះ ធ្វើឡើងចាប់ពីម៉ោង១០និង៣០នាទីព្រឹក រហូតដល់រសៀលថ្ងៃទី២៧ ខែមិថុនានេះ ស្ថិតនៅភូមិជន្លង់ សង្កាត់សាលាកំរើក ក្រុងសៀមរាប ដែលដឹកនាំដោយលោក សំរិទ្ធ សុខុន ព្រះរាជ្ញអាជ្ញារង អមសាលាដំបូងខេត្ដសៀមរាប ប៉ុន្ដែត្រូវបានដកថយវិញក្រោយមានជនជាតិវៀតណាមយកលិខិតមកប្រគល់ឱ្យរដ្ឋបាលព្រៃឈើ ដោយប្រាប់ថា ឈើមានច្បាប់អនុញ្ញាតពីនាយខណ្ឌរដ្ឋបាលព្រៃឈើ នៅខេត្ដព្រះវិហារ ខណៈមន្ដ្រីសមត្ថកិច្ចទាំងនោះរង់ចាំរាប់ម៉ោងពីម្ចាស់ឈើជនជាតិវៀតណាមនោះ។ បើតាមការមើលឃើញជាក់ស្ដែងឈើប្រភេទលេខ១នេះ ត្រូវបានក្រុមជនជាតិវៀតណាមចំនួន៧នាក់ ដាក់ម៉ាស៊ីនកែច្នៃឈើនោះជាចំរៀកៗ ដាក់ជាគំនរឈើនៅក្នុងសមាគមន៍វៀតណាម ដែលមានរយៈពេលជាច្រើនខែមកហើយ គឺសម្រាប់លក់ដូរ និងចែកចាយក្នុងក្រុងសៀមរាប ។
ជាមួយគ្នានោះក្រុមសមត្ថកិច្ចនគរអន្ដោប្រវេសន៍ បានសាកសួរក្រុមជាងជនជាតិវៀតណាមទាំងនោះរួចហើយ បានឱ្យត្រឡប់ទៅវិញ ក្រោយពេលរកឃើញថា ពួកគេរស់នៅកម្ពុជាដោយស្របច្បាប់។ ទោះជាយ៉ាងណា ប្រធានសមាគមន៍វៀតណាម បានបដិសេធមិនឆ្លើយតបជាមួយអ្នកសារព័ត៌មាននោះដោយប្រាប់ថា មិនដឹងឈើនោះជារបស់អ្នកណាទេ។ក្រោយពីក្រុមសមត្ថកិច្ច ធ្វើការត្រួតពិនិត្យឈើទាំងនោះប្រមាណជាង៣ម៉ោងរួចមក ទើបគេឃើញជនជាតិវៀតណាមមួយរូបឈ្មោះ យ៉ុង ភេទប្រុស បានយកលិខិតមកឱ្យមេព្រៃមួយច្បាប់ រួចហើយក៏ដើរចេញទៅបាត់វិញ ខណៈក្រុមអ្នកសារព័ត៌មាន ប្រឹងព្យាយាមសាកសួរពីការដាក់ម៉ាស៊ីនជ្រៀកឈើ និងកែច្នៃឈើនៅក្នុងសមាគមន៍នោះ យ៉ាងណាក៏ដោយ ពួកគេក៏មិនបានប្រាប់ដែរ។
ករណីខាងលើនេះ លោកវរសេនីយ៍ឯក សឿន សេន នាយការិយាល័យនគរបាល ប្រឆាំងបទល្មើសសេដ្ឋកិច្ច ខេត្តសៀមរាប បានប្រាប់កោះសន្តិភាពនៅវេលាម៉ោង៤និង០០នាទីថ្ងៃទី២៨ ខែមិថុនា ឆ្នាំ២០១៦នេះថា បន្ទាប់ពីកម្លាំងរបស់លោកបានចុះមកដល់ទីតាំងសមាគមន៍ខ្មែរ វៀតណាម រួចមកកម្លាំងជំនាញក៏បានរកឃើញនូវឃើញប្រណិតជាច្រើនកន្លែង និងមានម៉ាស៊ីនសម្រាប់អារឈើចំនួន២គ្រឿងនៅខាងក្រោយសមាគមន៍នោះ។ លោកបានបញ្ជាក់ថា បន្ទាប់ពីមន្ត្រីរដ្ឋបាលព្រៃឈើចុះមកដល់ទីតាំងខាងលើ ក៏ឃើញមានជនជាតិវៀតណាមបានយកឯកសារមកឱ្យមើល រួចមន្ត្រីព្រៃឈើក៏បានរាយការណ៍តាមទូរស័ព្ទទៅឱ្យព្រះរាជអាជ្ញាប្រាប់ថា ឈើទាំងនោះមានច្បាប់ទេ លោកឭដូច្នោះ ក៏ឱ្យកម្លាំងដកចេញ។ ចំណែកនៅកន្លែងសិប្បកម្ម គេឃើញ គំនរឈើ ប្រណិតជាច្រើនម៉ែត្រគូប និងម៉ាស៊ីនជ្រៀក ដោយសមត្ថកិច្ចនិយាយថា ថៅកែជាជនជាតិវៀតណាម ឈ្មោះយ៉ុងមិនបាននៅកន្លែងបង្ក្រាបនោះទេ។
ជុំវិញករណីខាងលើនេះដែរលោក យឹម ស៊ីវន នាយសង្កាត់រដ្ឋបាលព្រៃឈើបាគងបានប្រាប់តាមទូរស័ព្ទនៅរសៀលថ្ងៃទី២៨ ខែមិថុនា ឆ្នាំ២០១៦នេះថា បានឆ្លើយការពារលើការស្ដុកឈើរបស់ជនជាតិវៀតណាមឈ្មោះ យ៉ុង នៅក្នុងសមាគមន៍នោះ។ លោក យឹមស៊ីវន អះអាងថា ឈើលេខមួយនេះចំនួន២៤ម៉ែត្រគូប ជាប្រភេទឈើ សុក្រំ និងឈើផ្ចឹក គេមានច្បាប់អនុញ្ញាត គឺស៊ីញ៉េចេញពីមន្ដ្រីព្រៃឈើមួយរូបនៅស្រុកជាំក្សាន្ដឈ្មោះ ម៉ក់ បញ្ញា ដឹកចូលមកចែកចាយក្នុងភូមិជន្លង់សង្កាត់សៀមរាប។ ទោះជាយ៉ាងណាឈើប្រណិតទាំងនោះគេសង្ស័យថា ជាឈើខុសច្បាប់ ព្រោះលិខិតដឹកជញ្ជូនឈើ មិនបានដាក់ទីតាំងពិតប្រាកដនៅក្នុងសមាគមន៍ខ្មែរ វៀតណាមនោះទេ ខណៈដែលនៅក្បែរសមាគមន៍នោះជាប្រភពកន្លែងរោងសិប្បកម្មកែច្នៃឈើគ្រប់ប្រភេទ។
គួររំលឹកផងដែរថា មជ្ឈដ្ឋាននានាបានរិះគន់ថា ការចុះបង្ក្រាបឈើម្តងៗ មិនដែលឃើញសមត្ថកិច្ចនគរបាល និងមន្ត្រីរដ្ឋបាលព្រៃឈើ ហាក់បីដូចមិនចុះសម្រុងនឹងគ្នាសោះ ធ្វើឱ្យពលរដ្ឋខ្សឹបប្រាប់តៗគ្នាថា ប្រហែលជាកន្លែងនោះដាក់ខែ ឱ្យមន្ត្រីជំនាញមួយចំនួន បានជាឆ្លើយម្តងៗថា មានច្បាប់ របស់ក្រុមហ៊ុននេះ ក្រុមហ៊ុននោះ មិនដែលមន្ត្រីមេព្រៃថា ពួកឈ្មួញទាំងនោះ អត់ច្បាប់ម្តងណាសោះ៕
ចែករំលែកព័តមាននេះ