ខេត្តស្ទឹងត្រែង ៖ ក្រុមអាជ្ញាធរមានសមត្ថកិច្ចប្រមាណជាង៤០ទៅ៥០នាក់មកពីអង្គភាពប្រដាប់អាវុធចម្រុះ បានដាក់ពង្រាយការពារនិងរារាំងក្រោមបញ្ជារបស់អាជ្ញាធរខេត្តទប់ស្កាត់ក្រុមនិស្សិត ដែលមានគ្នាជាង៣០នាក់ធ្វើដំណើរតាមរថយន្តកាមីញ៉ុង រួមនឹងរថយន្តផ្ទាល់ខ្លួនចំនួន៣គ្រឿង មកពីរាជធានីភ្នំពេញ ក្នុងគោលបំណងចូលតំបន់ព្រៃឡង់ ដើម្បីសិក្សាពីធនធានព្រៃឈើ ។
អាជ្ញាធរស្រុកថាឡាបរិវ៉ាត់ បានដាក់កងកម្លាំងប្រដាប់អាវុធជាច្រើននាក់ ហាមឃាត់រថយន្តចំនួន៣គ្រឿង នៅគល់ស្ពានមិត្តភាពកម្ពុជា-ចិនស្ទឹងត្រែងត្រើយខាងលិច កាលពីល្ងាចថ្ងៃទី១៣ ឧសភា ។ ការហាមឃាត់ពីសំណាក់អាជ្ញាធរមានសមត្ថកិច្ចនោះ ត្រូវបានក្រុមយុវនិស្សិតទាំងនោះនិយាយថា ជារឿងដែលគ្មានហេតុផល និងមិនត្រឹមត្រូវសោះ ក្នុងការគោរពសិទ្ធិសេរីភាពរបស់ប្រជាពលរដ្ឋក្នុងការដើរហើរ។ ចំណែកអាជ្ញាធរស្រុកបានប្រាប់តបទៅវិញថា ការប្រមូលផ្តុំមនុស្សច្រើននាក់អាចជារឿងមិនល្អ ហើយគោលបំណងដែលចង់ទៅតំបន់ព្រៃឡង់ មិនមានការអនុញ្ញាតនិងជូនដំណឹងដល់អាជ្ញាធរជាមុន ។
ការកាប់ទន្ទ្រានព្រៃឈើមានតម្លៃនៅតំបន់ព្រៃឡង់ដែលមានផ្ទៃដីជាង២០ម៉ឺនហិកតា និងមានព្រំប្រទល់ជាប់គ្នាចំនួន៤ខេត្ត មានខេត្តកំពង់ធំ ខេត្តក្រចេះ ខេត្តព្រះវិហារ និងខេត្តស្ទឹងត្រែង ហាក់ដូចជាកំពុងធ្វើឱ្យសាធារណជនពិសេសក្រុមអង្គការសង្គមស៊ីវិលមានការយកចិត្តទុកដាក់យ៉ាងខ្លាំង ខណៈព្រៃឈើនៅក្នុងតំបន់ព្រៃឡង់ត្រូវបានប្រជាសហគមន៍ទាំង៤ខេត្តនិយាយថាស្ទើររលាយហិនហោចអស់ទៅហើយ ដោយសង្ស័យមានការកាប់បំផ្លាញដែលមានការឃុបឃិតដោយអ្នកមានអំណាច ។ ប្រជាសហគមន៍ទាំងនោះបានឱ្យដឹងថា ព្រៃឡង់ គឺឡង់សេតែខាងក្រៅប៉ុណ្ណោះចំណែកខាងក្នុងត្រងោលដូចបាតខ្ទះ ។
ព្រៃឡង់នៅខេត្តស្ទឹងត្រែងជាប់ស្រុកចំនួន២ គឺស្រុកសៀមបូកនិងស្រុកថាឡាបរិវ៉ាត់និងមានចំនួន៥ឃុំ ។ កាលពីពេលថ្មីៗនេះ ប្រធានសហគមន៍រាជសាល បានដឹកនាំប្រជាសហគមន៍ពីខេត្តស្ទឹងត្រែងរួមជាមួយប្រធានសហគមន៍ ចំនួន៣ខេត្តទៀត ចុះធ្វើល្បាតនិងឈានដល់ការចាប់ម៉ាស៊ីនត្រង់សឺន័រ ជិត១០គ្រឿងដុតកម្ទេចចោល នៅក្នុងតំបន់ព្រៃឡង់រួមជាមួយគំនរឈើប្រណីតរាប់សិបម៉ែត្រគូប ។ សកម្មភាពនេះត្រូវបានអះអាងថា ជាការគំរាមដល់អ្នកកាប់ព្រៃដទៃទៀតឱ្យបញ្ឈប់សកម្មភាពបំផ្លាញព្រៃឈើក្នុងតំបន់ព្រៃឡង់នោះ ។
ការចាត់វិធានការបែបនេះ ក្រុមឈ្មួញនិងក្រុមអ្នកកាប់ទន្ទ្រានឈើប្រណីតបានខឹងសម្បាយ៉ាងខ្លាំងទៅលើសហគមន៍ការពារព្រៃឈើទាំងនោះ រហូតឈានដល់ការគំរាមកំហែងផ្នែកសុវត្ថិភាពនិងដាក់ពាក្យប្តឹង ទៅស្ថាប័នមានសមត្ថកិច្ចផងដែរ ក្រោមការផ្សះផ្សាទាមទារកដំណោះស្រាយដោយលើកលែងការដុតកម្ទេចសម្ភារ រួមនឹងឈើប្រណីតទាំងនោះ ។
ក្រោយហេតុការណ៍នោះ ប្រព័ន្ធផ្សព្វផ្សាយមួយចំនួនបានចុះផ្សាយអំពីសកម្មភាពរុករាននិងសកម្មភាពដុតកម្ទេចម៉ាស៊ីនយន្តចោល ធ្វើឱ្យមានភាពរង្គោះរង្គើនិងរសើបយ៉ាងខ្លាំងទៅដល់មជ្ឈដ្ឋានសង្គម ទើបមានការចុះស្រាវជ្រាវដោយក្រុមនិស្សិត ដើម្បីចង់ឃើញសម្បត្តិព្រៃឈើ និងការរងគ្រោះនៃសម្បត្តិធម្មជាតិនេះបែបណា ។
ក្រុមនិស្សិតទាំងជាង៣០នាក់ ដែលបានធ្វើដំណើរពីភ្នំពេញមកកាន់ខេត្តស្ទឹងត្រែង និងត្រៀមធ្វើដំណើរទៅសម្រាកនៅភូមិកាំងចាម ស្រុកសៀមបូក ត្រូវបានរារាំងនិងហាមឃាត់ដោយអាជ្ញាធរនិងសមត្ថកិច្ច មិនឱ្យធ្វើដំណើរទៅតំបន់ព្រៃទ្បង់ទេ ដោយក្រុមមន្ត្រីសំអាងថា មិនបានផ្តល់ដំណឹងនិងសុំការអនុញ្ញាតពីអាជ្ញាធរជាមុន ។ លោក កែម ទ្បី អ្នកស្រាវជ្រាវសង្គមបានប្រាប់អ្នកសារព័ត៌មានថា ការរារាំងនេះមិនត្រឹមត្រូវ និងហួសសម័យទៅហើយ ។
និស្សិតម្នាក់ក្នុងចំណោមក្រុមនិស្សិតមកពីសាកលវិទ្យាល័យនៅរាជធានីភ្នំពេញនិយាយថា ក្រុមខ្លួនបានរួមមតិគ្នាដើម្បីធ្វើដំណើរទេសចរណ៍ទៅខេត្តព្រះវិហារ និងបន្តទៅខេត្តសៀមរាប តែដោយមានការពិភាក្សាគ្នាថា ចង់ចូលទៅមើលព្រៃទ្បង់ ពួកខ្លួនក៏បានសម្រេចថា នឹងទៅសម្រាកនៅភូមិកំណើតរបស់ខ្លួនក្នុងភូមិកាំងចាម ។ លុះព្រឹកទ្បើងបន្តទៅលេងព្រៃដោយពុំមានបំណងផ្តុំគ្នាធ្វើអ្វីដែលផ្ទុយពីច្បាប់ទ្បើយ ។ ម្យ៉ាងទៀតបើទោះជាពួកខ្លួនមានបំណងចូលធ្វើទស្សនកិច្ចសិក្សាអំពីព្រៃឈើ ក៏មិនមែនជារឿងខុសច្បាប់អ្វីដែរ ហើយគ្មានច្បាប់ណាដែលហាមឃាត់ប្រជាពលរដ្ឋមិនឱ្យចូលព្រៃធ្វើការសិក្សាអំពីធនធានធម្មជាតិនោះដែរ ។
ដោយឡែកអភិបាលស្រុកថាទ្បាបរិវ៉ាត់ លោក ថោង ស្រាន់ រួមជាមួយសមត្ថកិច្ចបានលើកទ្បើងថា ក្រុមនិស្សិតទាំងនោះគ្មានលិខិតអនុញ្ញាតនិងផ្តល់ដំណឹង និងសុំការអនុញ្ញាតពីអាជ្ញាធរខេត្តទេ ហើយក្រុមអាជ្ញាធរហាមឃាត់នេះ គឺយល់ឃើញថា ការប្រមូលផ្តុំមនុស្សច្រើននាក់ មិនមែនជាការល្អ ផ្ទុយទៅវិញ ក្រុមអាជ្ញាធរជួយការពារសុវត្ថិភាពជូនពួកគេទៅវិញទេ ។
ប្រភពពីសមត្ថកិច្ចសុំមិនបញ្ចេញឈ្មោះបានប្រាប់ថា ក្រុមអាជ្ញាធរបានត្រៀមកម្លាំងរួចជាស្រេច ដើម្បីធ្វើការរារាំងនិងទប់ស្កាត់ក្រុមនិស្សិតទាំងនោះ ដែលចង់ទៅតំបន់ព្រៃទ្បង់ ព្រោះទីនោះជាតំបន់ក្តៅបំផុតទាក់ទងនឹងអំពើពុករលួួយឃុបឃិតគ្នាបើកដៃឱ្យមានការកាប់ទន្ទ្រានព្រៃឈើ មានតម្លៃដោយគ្មានការបង្ក្រាប។ ដូច្នេះក្រុមអ្នកស្រាវជ្រាវសង្គម រួមជាមួយសហគមន៍ការពារព្រៃឈើបានរៀបចំគម្រោងទ្បើង ដើម្បីនាំគ្នាចុះទៅសិក្សាឱ្យពិតប្រាកដថា ការកាប់បំផ្លាញជាប់ព្រំប្រទល់៤ខេត្តនោះ មានការឃុបឃិតនិងប៉ះពាល់ដល់ធនធានព្រៃឈើក្នុងកម្រិតប៉ុនណា?
ប្រភពដដែលបន្តថា ប្រជាសហគមន៍ចំនួន៥ឃុំ មានគ្នារាប់រយនាក់បានត្រៀមទទួលក្រុមនិស្សិតស្រាវជ្រាវទាំងនោះ ដើម្បីជូនទៅដល់ទីតាំងតំបន់ព្រៃទ្បង់ តែការរំពឹងទុកនោះបានក្លាយជាការបរាជ័យរហូតឈានដល់ពួកគេសង្ស័យថា មានរឿងពិតនៅពីក្រោយខ្នងទើបបង្កើតជាការរារាំងឱ្យខាងតែបានក្នុងសកម្មភាពចុះទៅតំបន់ព្រៃឡង់នោះ ។
ក្រោយការចម្រូងចម្រាសនេះរួចមក អាជ្ញាធរស្រុកបានសំណូមពរដល់ក្រុមនិស្សិតទាំងនោះឱ្យទៅស្នាក់នៅបានសមរម្យ តែក្រុមនិស្សិតទាំងនោះមិនទទួលយកតាមការស្នើនោះឡើយ ដោយពួកគេបានបោះតង់និងសម្រាកនៅតាមខ្យូសតាមអាហារដ្ឋានក្បែរគល់ស្ពាន ។ ចំណែកសមត្ថកិច្ចក៏បានបន្ថែមកម្លាំងជាច្រើននាក់ទៀតដើម្បីការពារសន្តិសុខ ។ លុះព្រឹកឡើងក្រុមនិស្សិតនិងលោក កែម ឡី អ្នកស្រាវជាវសង្គមបានធ្វើដំណើរចាកចេញតាមរថយន្តរបស់ពួកគេពីខេត្តស្ទឹងត្រែងឆ្ពោះទៅខេត្តព្រះវិហារទាំងមុខក្រហម ។ ការរារាំងនេះមិនដឹងជាចំណេញឬអត់?
ចែករំលែកព័តមាននេះ