कर्जमाफी: शेतकऱ्याच्या खात्यातून पैसे माघारी

म. टा. वृत्तसेवा, पंढरपूर

कर्जमाफी मिळालेल्या शेतकऱ्यांच्या ‘मी लाभार्थी’च्या जाहिराती एकीकडे धडाक्यात सुरू आहेत, तर दुसरीकडे कर्जमाफीचा घोळ संपायला तयार नाही. कर्जमाफीसाठी शेतकऱ्याच्या खात्यावर भरलेली रक्कम सरकारने पुन्हा काढून घेतल्याचा प्रकार प्रकार समोर आला आहे.

पंढरपूर तालुक्यातील उपरी गावाचे देवानंद गणपत जगदाळे यांनी विदर्भ कोकण ग्रामीण बँकेच्या गादेगाव शाखेतून ६४,४०१ रुपयाचे कर्ज घेतले होते. सरकारच्या कर्जमाफीमध्ये या शाखेतील आठ कर्जदार शेतकऱ्यांना कर्जमाफी मिळाली होती. त्यांच्या खात्यात ३१ ऑक्टोंबरला कर्जाची रक्कम जमा झाली होती. त्यानंतर बँकेने देवानंद जगदाळे यांना मेसेज पाठवून कर्जखाते संपल्याचे कळविले होते. कर्जमाफीचा जगदाळे कुटुंबाला झाला. मात्र, तो फार काळ टिकला नाही. बँकेने १३ नोव्हेंबरला पुन्हा मेसेज करून खात्यावरील पैसे सरकारने परत घेतल्याचे सांगताच जगदाळे हादरून गेले. जगदाळे यांच्याप्रमाणे गादेगाव येथील अर्जुन कदम यांनादेखील ५६,५१६ रुपयाची कर्जमाफी झाली होती मात्र, त्यांच्याही खात्यातील रक्कम परत सरकारने काढून घेतली आहेत. जगदाळे यांच्यावर दुसऱ्या कोणत्याच बँकेचे कर्ज नाही. सरकारकडून फसवणूक झाल्याची भावना त्यांनी ‘मटा’शी बोलताना व्यक्त केली आहे. जगदाळे आणि कदम या दोन शेतकऱ्यांची कर्जखात्यात भरलेली रक्कम परत गेल्याने त्यांच्यासाठी औटघटकेची कर्जमाफी ठरली आहे.