中國移動 漫遊都衰:中國幾時鎖國

中國移動-鎖國-min

中國封網封到short咗,呢個唔係新聞,但連 中國移動 一卡兩號嘅漫遊都衰,就都真係幾奇聞吓,因為唔少高幹,都係用 中國移動 香港一卡兩號嚟翻牆,話就話實名,但始終香港人身份登記,要擺甩都唔難嘅。只不過,咁玩法都幾係一個警號嚟。

中國移動 都封一卡兩號代表乜

首先,呢次先搵 中國移動 嚟開刀,證明中共十九大前嘅鬥爭,已經去到一個啲開山刀漫天飛舞嘅程度,而 中國移動 作為江系嘅大本營之一,係唔係有人想阻止江系啲馬仔通訊,都十分之有懸念。

但依家驚VPN或者任何翻牆工具成咁,更大一個問題係,中國會唔會為咗阻止支爆,不惜再度鎖國,中國人一向有好奇怪嘅諗法,就係防止崩潰,就學以前毛澤東果陣咁鎖國,殺佢一堆人咪得,只要留番一個資金進出口就得,喺文革果陣,呢個進出口就係英國管治下嘅香港,因為英國人夠硬淨,抵擋得住中共嘅來犯,而澳門啲葡國佬太廢,喺123事件之後就輸到當底褲。所以,有啲人以為毛澤東年代嘅玩法係可行,係一啲都唔出奇。

當然,中國如果真係行鎖國政策,究竟係連香港都鎖埋,定係最終為咗中國保留最後同西方世界嘅通氣口,決定採取Hong Kong is out嘅政策,呢個係未知之數,事實上,對港政策本身都係中共內部嘅鬥爭課題嚟,中聯辦、董建華同梁振英最後仲有無命,我覺得呢個問題本身都係一個問號嚟。只不過,依家 中國移動 漫遊都衰埋,可以睇到中共內部鬥爭一旦失控,好多所謂嘅開放政策,好可能一下子人間蒸發,一如依家銀聯要喺海外碌咭,都要吓吓同中國外管局匯報一樣。

香港人應該留意,未來幾日中國翻牆政策嘅變化,北戴河會議將近,所以會封得更黐線,而中國聯通嘅一卡兩號穩唔穩陣,如果用csl、Smartone上去,又有無問題呢?呢啲都係值得細心注意嘅一啲細節嚟,啲人成日問,支爆幾時嚟,點解成日都唔嚟,我依家只能講,支爆隨時已經發生咗,海航集團同 中國移動 反映都係中國已經出現一片政治鬥爭所引發嘅混亂,呢啲混亂,好快就會影響到你財產同日常生活。

只不過,對中國啲官,同埋香港人嚟講,英國人返嚟可能最著數。

發佈留言

發佈留言必須填寫的電子郵件地址不會公開。 必填欄位標示為 *