膠觀點：如何喺 南京條約 框架下於界限街以南恢復英治，以及界限街以北恢復大清江山

侯志強喺城市論壇亂講廿四，話新界租俾英國人係根據《 南京條約 》，《 南京條約 》係永久割讓香港島本身嘅條約。新界係根據《展拓香港界址專條》租俾大英君主，唔識咪亂講。

只不過，香港呢件膠堅係有loophole，就係《中英聯合聲明》（或《英中聯合聲明》）本身，並無任何條文，廢除《 南京條約 》以及《北京條約》，只係《展拓香港界址專條》租約期滿，呢塊無主之地無人處理租務問題，中華人民共和國呢個僭建政府至乘機搏懵。

南京條約 框架下復辟大清帝國

如果中華人民共和國冚咗檔，由於《 南京條約 》同《北京條約》並無《烏得勒支和約》果隻，英王放棄割土主權必須奉還原主嘅膠條款（呢個係直布羅陀可以永遠膠落去嘅原因），所以中華人民共和國冚檔結果，係一定歸英，熱普城果班仆街講永續《基本法》都係無國際法常識嘅9up。但界限街以北可以點？

呢個問題，就要睇界限街以北嘅原主，亦即係大清帝國究竟將佢個帝國交咗俾乜水。

大清帝國瓦解算有法律交接程序，當時大清帝國政府係有退位詔書，敘明當時皇室同革命軍嘅協議，達致權力過渡。

因為中華民國政府，至今仍然係存在，所以界限街以北土地主權，根據退位詔書安排，喺台北中華民國政府度。所以一旦中華人民共和國崩潰，台北會面對兩個膠到無朋友嘅問題，第一個係如果南京市民獻城，中華民國政府要唔要，第二個就係，界限街以北，深圳河以南果堆土地點處理。

如果中華民國唔想理，當然可以宣布俾界限街以北，深圳河以南嘅民眾公投，但實會膠到核爆。如果要歸英，中華民國政府唔尷尬可以點，而唯一膠嘅方案，都喺退位詔書度，呢件事，需要金溥聰先生，係，馬英九果位hehe朋友，實名愛新覺羅．溥聰先生，擔任一個鐘嘅大清帝國皇帝。（或是但一位愛新覺羅氏皇族後人皆可，如果唔放溥聰嘅大中華膠思想，可以恭請日滿混血，有日本皇族血統嘅愛新覺羅．嫮生，擔任大清帝國唯一一任女皇帝一個鐘，反正大清帝國都好一段時間女人揸旗）

而呢個程序係咁：

1. 中華民國總統，蔡英文又好，乜水都好，承認走咗退位詔書數，故此將界限街以北，深圳河以南土地歸還大清帝國皇帝掌守。中華民國國會按程序通過相關安排。如果係恭請嫮生暫任大清帝國皇帝，要請她老人家去台北一轉。

2. 溥聰或嫮生手持中華民國歸還土地及帝位文件，抵達界限街以北地區，可以係太子道一帶，首都就是但，可以係九龍寨城公園。

3. 溥聰或嫮生手持文件宣布登基。

4. 登基後，隨即召集若干事前指派文武官員，召開一個御前會議。

5. 頒布另一份遜位詔書，並將深圳河以南，界限街以北土地，交予大英皇帝掌守，任便治理。香港人屆時可以要求英國國王，向大清皇帝給予一個貴族稱號，酬謝對方喺香港法理問題上重大貢獻。

跟住新界、香港、九龍於法律上便歸一統，要公投成為共和國，定係成為《西敏寺法》下嘅自治領（澳洲、加拿大式獨立），就大家喺House of Commons拗飽佢。乜嘢新界原居民問題，亦唔X關事，因為大清皇帝已經賜咗新界土地俾英皇，唔好再claim特權。係好膠，但本來香港問題係一舊膠，以膠治膠都無乜大錯。呢個亦係點解，我對熱普城乜叉永續《基本法》鄙視嘅原因，恭請大清帝國喺香港復國，並請日本、清皇室共同後人管治香港，都比僭健嘅中共《基本法》有法理地位。