ភាសាដាច់សាច់របស់អ្នកនយោបាយកំពុងសាបព្រោះទង្វើអសីលធម៌ក្នុងសង្គមខ្មែរ
សុភាសិតខ្មែរ “សំដីសជាតិ មារយាទសពូជ” ក្នុងនោះការអប់រំសីលធម៌របស់ខ្មែរគឺបង្រៀនឲ្យកូនខ្មែរចៀសវាងសំដីអសុរោះ ជេរបញ្ជោរ ជាពិសេសប្រពន្ធ័ផ្សព្វផ្សាយ មិនត្រូវលើកតម្កើងពាក្យជេរ រឺផ្សាយ ដែលនាំឲ្យក្លាយជាវប្បធម៌នោះទេ។ យ៉ាងណាមិញ អ្នកផ្សាយព័ត៌មាន ពិធីករពិធីការិនី តារាចម្រៀង អ្នកសិល្បៈគ្រប់ប្រភេទ ត្រូវបានហាមឃាត់ ប្រើប្រាស់ពាក្យអសុរោះទាំងនេះ មានតែអ្នកនយោបាយតែប៉ុណ្ណោះ ដែលមិនត្រូវបានហាមឃាត់។ អ្នកនយោបាយខ្លះ បានប្រើពាក្យអសុរោះជេរប្រមាថ ទៅលើអ្នកនយោបាយ ដែលជាគូប្រកួតប្រជែង។តើសំដីអសុរោះរបស់អ្នកនយោបាយ បង្ហាញពីចរិតអ្នកនយោបាយដែលគ្មានសីលធម៌? តើសំដីអសុរោះនេះនឹងជះឥទ្ឋិពលអ្វីខ្លះដល់សីលធម៌ ក្នុងសង្គមខ្មែរ?
ការអប់រំផ្នែកសីលធម៌ បានចាត់ទុកការជេរប្រមាថ ការប្រើពាក្យអសុរោះ ទ្រគោះបោះបោក មាក់ងាយ ជាទង្វើអសីលធម៌។ពលរដ្ឋខ្មែរ បានហៅបុគ្គល ដែលប្រើប្រាស់ពាក្យទាំងនេះថា ខ្វះការយល់ដឹង ឬថាមនុស្សគ្មានការអប់រំនៅក្នុងខ្លួន។
នៅក្នុងសង្គមគ្រួសារ ពាក្យអសុរោះ ទ្រគោះបោះបោក ជេរប្រមាថ បានជះឥទ្ឋិពលដល់កូនចៅ ក្នុងរង្វង់គ្រួសារទាំងមូល។នៅពេលកូនចៅនៃគ្រួសារនោះ ចូលចំណោម ក្នុងសង្គម តែងផ្សាយពាក្យអស់ទាំងនោះ ដែលទទួលបានពីគ្រួសារ ទៅដល់មនុស្សនៅមជ្ឈដ្ឋានខាងក្រៅ។គេចាត់ទុកគ្រួសារនោះថា គ្មានការអប់រំ ឬការអប់រំទាប។
ចុះនៅក្នុងសង្គមទាំងមូលវិញ នៅពេលថ្នាក់ដឹកនាំនយោបាយ ដែលជាបុគ្គលមានឥទ្ឋិពល អាចអូសទាញមនុស្សរាប់លាននាក់ ឲ្យគាំទ្រ និងដើរតាមមាគ៌ារបស់ខ្លួនឬក្រុមខ្លួន បែរជាប្រើពាក្យអសុរោះ ទ្រគោះបោះបោក មាក់ងាយ ជេរប្រមាថ តើវាជះឥទ្ឋិពល អាក្រក់យ៉ាងណាដល់សីលធម៌ក្នុងសង្គម?
លោកកែម ឡី អ្នកតាមដានស្ថានការណ៍សង្គម មើលឃើញថា វប្បធម៌ជេរប្រមាថនេះ កើតមានតាំងពីសម័យសង្គមរាស្ត្រនិយមមកម្លេះ។ លោកកែម ឡី ចាត់ទុកទីលាននយោបាយសព្វថ្ងៃ ប្រៀបបាននឹង ព្រៃ ដែលសុទ្ធតែសត្វកាច សាហាវ យង់ឃ្នង ឯអ្នកដែលមានសីលធម៌ល្អ មិនហ៊ានចូលប្រឡូកក្នុង នយោបាយបែបនេះទេ។ លោកកែម ឡីបញ្ជាក់ថា រូបភាពនេះ ពិតជាបានជះឥទ្ឋិពលអាក្រក់ដល់សង្គម គឺជាសង្គមមួយដែលមានតែហិង្សា ហើយបើចង់កែមកវិញ ទាល់តែអ្នកដែលមានសីលធម៌ល្អ ចូលរួមធ្វើ និងសាបព្រោះនូវអំពើល្អឡើងវិញ…… ……………
សំឡេងលោកកែម ឡី៖
ដោយឡែកសម្រាប់លោកចាន់ វិបុលអ្នកវិភាគ និងឃ្លាំមើលអភិបាលកិច្ចនៅកម្ពុជា បានមើលឃើញថា អ្នកដឹកនាំនយោបាយ ជំនាន់នេះ មានចំណេះជំនាញ ការយល់ដឹងពីប្រជាធិបតេយ្យ សិទ្ធិមនុស្ស ប៉ុន្តែភាពខ្វះការយល់ដឹងពីលទ្ធិពុទ្ធសាសនា របស់ពួកអ្នកនយោបាយ ជាដើមចមនៃការនាំឲ្យមេដឹកនាំបាត់ បង់សីលធម៌…………………………………………………
សំឡេងលោកចាន់ វិបុល៖
លោកចាន់ វិបុល លើកឡើងថា អតីតកាលនៃប្រវត្តិសាស្ត្របានបង្រៀនមនុស្ស ឲ្យគាំទ្រនូវហិង្សា។ លោកថា ផ្នត់គំនិតខ្មែរយល់ឲ្យតម្លៃលើអ្នកដឹកនាំដែលហ៊ានកំចាត់ ហ៊ានបំបាក់គូសត្រូវ ទើបសម ជា មេដឹកនាំ។សំណួរសួរថា តើមានវិធីណាបញ្ឈប់នូវវប្បធម៌ជេរប្រមាថបែបហិង្សានេះបាន លោកចាន់ វិបុលថាប្រជាពលរដ្ឋគួរងាកមកជ្រើសមេដឹកនាំ ដែលល្អ ដើម្បីផ្លាស់ប្តូវប្បធម៌នេះ………………………..
សំឡេងលោកចាន់ វិបុល៖
ជាការគួរឲ្យកត់សម្គាល់សារនយោបាយ របស់អ្នកនយោបាយបច្ចុប្បន្ន មានតែពាក្យគំរោះគំរើយ ទ្រគោះបោះបោក ជេរប្រមាថបែបហិង្សា ដែលពិបាកស្តាប់ និងស្ទើរតែមិនអាចទទួលយកបាន ក្នុងនាមជាមេដឹកនាំនយោបាយ។ និន្នការនេះបានចូលជ្រាបដល់ អ្នកបេះដូងអ្នកគាំទ្រដែលរិះគន់បន្ទរតាម មេដឹកនាំខ្លួន ដោយបន្តការរិះគន់បែបជេរប្រមាថ បន្តុះបង្អាប់ ស្ទើរក្លាយជាទម្លាប់ ៕
ដោយ៖ខាត់ សុធី
ព្រឹក៖ ម៉ោង ៦:០០-៧:០០