“វាយតំណាងរាស្ត្រជាប់គុក៤ឆ្នាំព្យួរ៣ឆ្នាំ អ្នកកាន់មេក្រូនិយាយជាប់គុក២០ឆ្នាំ”
លោក យ៉ែម បុញ្ញឬទ្ធិ មន្ត្រីជាន់ខ្ពស់គណបក្សសង្គ្រោះជាតិ បានលើកឡើងថា គណបក្សសង្គ្រោះជាតិចង់ឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌នៅកម្ពុជា។ ក្នុងនោះ ដើម្បីមានការផ្លាស់ប្តូរ លុះត្រាតែមានការចូលរួមពីប្រជាពលរដ្ឋ។
ជាមួយគ្នានេះលោក យ៉ែម បុញ្ញឬទ្ធិ បានបន្ថែមថា ទាំងប្រជាពលរដ្ឋ និងអ្នកតំណាងរាស្ត្រ ចង់ទទួលបានសិទ្ធិសេរីភាពពេញលេញ និងយុត្តិធម៌សង្គមពិតប្រាកដ មិនមែនអ្នកវាយតំណាងរាស្ត្រជាប់គុក៤ឆ្នាំ ព្យួរ៣ឆ្នាំ តែអ្នកកាន់មេក្រូនិយាយ បែរជាជាប់គុក២០ឆ្នាំនោះទេ គណបក្សសង្គ្រោះជាតិមិនអាចទទួលយកប្រពន្ធ័យុត្តិធម៌បែបនេះឡើយ......
សំឡេងលោក យ៉ែម បុញ្ញឬទ្ធិ៖
ការលើកឡើងរបស់លោក យ៉ែម បុញ្ញឬទ្ធិ នេះ គឺនៅចំពោះមុខអ្នកគាំទ្ររាប់រយនាក់ នៅព្រឹកថ្ងៃទី៣០ ឧសភានេះ មុខទីស្នាក់ការគណបក្សសង្គ្រោះជាតិ បន្ទាប់ពីសមាជិករដ្ឋសភាមកពីគណបក្សប្រជាជនកម្ពុជា ចំនួន៦៨រូបបានបោះឆ្នោត សម្រេចឲ្យសមត្ថកិច្ចចាត់ការទៅតាមនីតិវិធីច្បាប់ ករណីលោក កឹម សុខា អនុប្រធានគណបក្សសង្គ្រោះជាតិ។ លោកកឹម សុខា ត្រូវបានតុលាការចោទប្រកាន់ពីបទ"បដិសេធ ក្នុងការចូលខ្លួន" បន្ទាប់ពីលោកមិនបានចូលបំភ្លឺ តាមដីការរបស់តុលាការ ក្នុងសំណុំរឿងសញ្ចារកម្ម ក្នុងនាមសាក្សី ៕