陳茂波 喺穆迪調低香港信貸評級後，大大聲話強烈唔認同被降信貸評級。如果其他人做財政司司長，抗議都話有番啲根據嘅，只不過， 陳茂波 呢條茂利，我勸佢就出少句聲好啲，因為 陳茂波 做財政司司長呢樣嘢，本身已經係香港有可能被降低信貸評級嘅理由。
陳茂波 當全世界係白痴定係傻？
以往，由曾蔭權爵士到曾俊華，歷任財政司司長都好少會累到香港降信貸評級，一係好似曾蔭權爵士、曾俊華咁，師承彭勵治、麥高樂等英國人嘅理財哲學，一係好似梁錦松、唐英年咁，佢地喺商界都係有啲斤兩嘅人，至少俾盤數佢管，都會係有板有眼，唔會搞到污厘單刀。或者有小小操守有問題，立即被人轟落嚟，好似梁錦松，就係因為偷步買車被人轟咗落台，到依家都係返唔到政壇。
陳茂波 係一個點嘅人，一個利用大量BVI公司幫自己搞劏房嘅人，花名都有得你叫，劏房波，一個咁嘅人管香港公共財政，即係捉老鼠入米缸，香港啲傻藍屍仲可以呃吓，外國評級機構啲人都係見過古惑佬嘅人，你估佢地唔知你 陳茂波 嘅本質，所以穆迪嘅報告，無直接將梁振英同 陳茂波 列為香港信貸評級嘅主要麻煩根源，佢地已經十分之俾面。除咗中國因素， 陳茂波 同梁振英兩條人渣，絕對係香港公共財政嘅問題來源，如果呢兩條友仍然可以掌控香港公共行政，香港永無寧日。
林鄭月娥，唔係對香港公共財政管理一無所知，畢竟佢做過庫務科，好熟程序同規矩，雖然林鄭月娥自己都唔係乜嘢好人，但佢至少知道， 陳茂波 繼續做財政司司長，國際社會係會點睇香港嘅公共財政，所以林鄭月娥有傳好想換走 陳茂波 ，我相信呢件事係屬實，只不過，佢自己估唔到佢自己嘅權力仲少過大韓帝國最後一任皇帝純宗，甚至連滿洲國皇帝愛新覺羅．溥?都不如啫。
香港人仲懵吓懵吓，唔知自己副身家，已經被政府呢班仆街敗緊，而且立業難，但敗家易，我真係睇 陳茂波 下一份佢自己操刀嘅預算案將會有幾離譜，我相信，香港明年信貸評級，除咗受中國因素影響，更可能受到 陳茂波 因素嘅影響，我真係祝大家好運嘞。 陳茂波 ，本身就係一個問題。