Celine老豆譚生父憑女貴，因 Celine 喺America’s Got Talent嘅facebook得到promote，跟住也文也武。作風惹嚟一堆葡萄X，本來唔奇，但譚生被查到係 假博士 ，仲要係國力書院嘅 假博士 ，不單未能夠父憑女貴，更隨時會惹嚟刑事調查，因為國力書院一類diploma mill嘅學歷，嚴格嚟講根本係偽造文書嚟，如果警方唔作出跟進，唔再追查國力書院事件嘅話，只能講呢個教育局可以執咗佢，因為無人會當呢樣嘢係一回事。]
但一個更有趣嘅問題係需要回應，點解香港呢個咁鄙視知識分子嘅地方，由土共到譚生，都要攞番個假學歷招搖撞騙，國力書院嘅 假博士 生意，背後有乜社會怪現象去支持佢嘅呢？
假博士 都係踐踏緊知識
雖然學術界仍然係沙紙主義橫行，但喺社會科學呢方面，有啲經濟學高手級學者，可能終其一生都無博士榮銜，但無礙喺經濟學界嘅地位，畢竟學術呢樣嘢，都係講你有幾多impact(唔係土共學者講嘅衝擊因子)，陳文敏夠唔係博士，但佢喺學術上嘅貢獻，得到全香港得佢一個有嘅榮譽資深大律師，呢個頭銜大過晒所有博士咁滯。
大家留意一下，熱衷買 假博士 嘅，其實都係土共政客，以及一啲娛樂界人士，其實呢啲人係有好嚴重嘅自卑心態，佢地對年青果陣，因唔同原因未能攞番個博士返嚟感到好自卑，自己好恨有個學位，但又唔甘心被其他社會人士話佢地不學無術，所以至搵菲律賓果啲學店出嚟，印畢業證書俾自己，甚至將印畢業證書變成咗一盤偷呃拐騙嘅生意。而果啲處於社會中游位置，但又未上到上游嘅人，最有誘因去買 假博士 返嚟。因為佢地未有錢到，可以向大學提供大筆捐助為自己換番個榮譽博士學位，但又需要一個學位，嚟方便佢地喺社會度繼續爬上去，所以最有可能去買 假博士 返嚟。Celine老豆如此，資訊科技界恥辱，前iProA會長葛珮帆，其實都係呢種心態。為咗可以上位，買番個 假博士 返嚟先講，而當中過程係唔係合法，或者佢地自己有無喺學習過程中有所得著，呢啲人根本係唔會在乎嘅。
要避免 假博士 問題蔓延落去，教育局固然有責任去拘捕同檢控國力書院相關人等，而唔係去包庇佢地。依家教育局走去檢控本土研究社班左膠，都唔係對付國力書院果啲文憑黨，根本可以反映出，吳克儉係有心包庇呢啲人，而由於民建聯裡面有唔少人係買 假博士 返嚟，所以係唔可以俾蔡若蓮做教育局副局長，其實亦都有防止國力書院問題蔓延嘅考量喺裡面。
當然，要徹底杜絕 假博士 問題蔓延，最終有效嘅方案，唔單只要打擊國力書院，更加要形成真係尊重學術界嘅風氣，打擊果啲論文抄襲嘅仆街，唔好再要求各大學做埋啲對香港社會根本無幫助，搏喺國際學報見報嘅論文，好似德國咁，個博士係十分之難讀，但亦因為咁，社會對博士同教授，反而有發乎內心嘅尊重，因為大家都知道，每一個博士或教授頭銜背後，都係對人類社會嘅重大貢獻，以及對整個社會嘅犧牲精神。但當土共當政者，仍然千方百計要包庇國力書院果陣， 假博士 問題係唔會消失，而香港變成一個尊重知識嘅社會，仍然喺一條遙遠嘅路，甚至可能經過重大嘅政權更替，以及社會革命，至可能出現一個真正尊重知識嘅社會，當權嘅人唔會對買返嚟嘅頭銜十分熱衷，樂此不疲咁喺菲律賓買個不知名學位，仲好意思攞出嚟招徭過市，甚至成為議員。
(我個人仍然十分之希望，葛珮帆退出互聯網專業協會，並且辭去立法會議員職務，呢條友買 假博士 根本令iProA會員抬唔起頭做人，呢條友千方百計保住假學位同權位嘅行為，係十分之自私，兼且無恥和無賴。)