坐得廉航，大家當然唔預期有太好嘅服務，例如飛機餐要另買，或者座位設備簡單之類。只不過，呢啲都唔係問題，如果出咗事故，由得乘客喺跑道上乾等，就好有問題，呢啲就真係去到聯合航空級嘅惡劣服務。好不幸， HKExpress 喺東航垃圾機師搞到機場大亂之後，服務真係十分之有問題。
HKExpress 由得乘客坐六個鐘咁都得
平日 HKExpress 呢啲海航系航空公司，搞delay都算，好多人都以為坐廉航一定要忍受delay。只不過，昨日係東航機師自己硬膠，搞到大delay，本來都可以原諒。只不過，如果明知自己飛唔到，就應該快快放番啲客走，啲機票點賠，就搵東航拆掂，但啲乘客係唔應該罰坐，而 HKExpress 夠膽要乘客喺架機度乾坐六個鐘，我啲朋友受困喺架機度，好多都係鬧爆呢間嘢嘅態度，究竟呢間航空公司罰個客坐六個鐘想點。
廉航比起Premium Airlines喺處理呢類危機最大劣勢係，好似因航咁，可以派飛機餐、飲品俾乘客，飛機座位有電插座，就算玩手機，或者喺電腦做嘢，唔至於電力耗盡，係浪費時間都好，都唔會搞到支援不足，但 HKExpress 呢啲廉航，果啲A320客機，一定係全Y Class，最基本規格嘅安排，飛機上嘅飛機餐因為係賣嘅，亦唔會準備到每位乘客都有一份嘅情況，所以乘客喺果六個鐘白坐，又無電充，又無嘢食，飲嘢最多只係清水，呢種玩法唔俾人鬧爆就出奇。所以 HKExpress 呢次，我只能講係安排極度失當，唔同機管局一早要巴士放走啲客，機件唔掂仲係想搏懵飛上去，搞到啲cabin crew嘅working hours爆晒，根據ICAO規矩真係飛唔到，至侷住放走晒啲客，結果係陪東航一齊搞出關公災難，完全唔知自己為啲乜。
廉航係無乜services，但唔代表係連最基本嘅判斷同常識都無，如果 HKExpress 當係一間中國航空公司咁營運，咁唔該快啲改名做 ChinaExpress 先，一間以香港基地嘅航空公司，係應該有番最基本嘅服務水平同常識。