羅哲斯 嚟香港，本來係一件小事，但中國外交官班大清帝國時代石化思維官員，搞到件事變成一鑊泡事件，如果月底上議院有重大法案擺上嚟有關香港，我唔會意外，因為基本上，中國喺 羅哲斯 事件以及北韓黑錢問題上，玩到著晒火。
羅哲斯 事件比想像中大鑊好多
羅哲斯 事件，呢次係觸發英國外交部傳召中國駐英大使，呢個係好高級別嘅抗議，但House of Commons嘅議長John Bercow嘅一句scandalous回應，亦都係好重要，大家對John Bercow嘅對白，知得最多係Order Order，仲要佢比較矮小，你會諗起Minion，佢好少就一件事發表佢嘅comment，呢個亦係英國式嘅understatment，佢講得呢個字，即係事態好嚴重。
當然，呢件事會係一條導火線，但導火線本身，一定實際有其他事做backup，呢個係讀西史嘅常識，而 羅哲斯 事件發生嘅同時，聯合國報告指北韓利用香港空殻公司搵銀，而香港空殻公司關鍵地位在於利用CHATS嘅美金及歐元跨行轉帳機制處理交易，呢個金管局擁有嘅系統，竟然對北韓嘅交易隻眼開隻眼閉，你又唔見金管局對香港眾志嘅銀行戶口隻眼開隻眼閉，好明顯，北京係指令金管局幫北韓搵銀，你覺得美國同英國唔會想堵塞CHATS嘅漏洞，CHATS變咗一個唔受英美監管嘅美金、歐元交易管道，呢件事上，美國一定要英國做番啲嘢，因為唔係乜嘢都係美國方便出手。
大家讀一次大戰歷史都知，英國因履行保證比利時中立嘅《倫敦條約》參戰，而奧地利係因喺皇位繼承人斐迪南大公(Franz Ferdinand von Österreich-Este)喺薩拉熱窩遇弒引發，但一次大戰一早醞釀好耐，歐洲、美國同日本，一大堆檯底交易磨拳擦掌，因為利益問題講唔掂數就係講唔掂數。香港作為一個戰爭導火線，真係十分之適合，大量英國公民同國民在港居住，中國唔理《中英聯合聲明》迫害香港人，兼實現自己嘅大中華帝國夢，香港、北韓、台灣，全部都係火藥庫嚟。