相信一個人,不如相信每一個人 (點解有呢本以 曾俊華 為藍本嘅平行時空小說 引言)

其實我係唔係 曾俊華 ,並唔係最緊要,相信一個人,不如相信每一個人。香港嘅未來,要靠我們團結拍住上!

– 曾俊華 2017年2月27日,請支持行政長官候選人曾俊華宣傳片。

點解我忽然寫小說關於 曾俊華

寫平行時空呢家嘢,我相信我唔係最擅長,因為我唔會好似沈旭暉教授咁,持之以恆日日係咁寫。我呢世人,成日想寫小說,但極少有一個好完整,我執行到嘅構思,去付諸實行寫成一本小說。另一方面,我亦無乜嘢,去迫使我好有紀律咁寫小說,你估巴爾扎克咁,成世人駛大咗,爭落成堆債,啲債多到上個鼻度果隻,所以係咁狂寫《人間喜劇》嘅系列小說。如果成個構思唔夠好玩,或者有意義,或者有挑戰性,你要我坐定定咁寫小說,都係一件幾難嘅一件事。

只不過,由2017年1月到2017年3月26日嘅選戰,竟然造就咗一大堆薯粉,而 曾俊華 高民望敗選之後,成班薯粉感到好唔開心,好落寞。突然諗到阿Sir選戰期間嘅金句,我們要延續呢個夢。問題嚟喇,呢個夢點維持落去呢,雖然我都慣咗參與一啲短期無結果嘅社會運動,例如BNO平權,但係,一時三刻攞個方法出嚟,就唔係你講咁容易。

直至到3月28日,林鄭月娥向梁振英要求取消今年小三TSA,竟然食咗檸檬,果陣我諗,如果依家薯片做,梁振英同曾俊華之間嘅鬥法,將會係一個點嘅情況,跟住我諗大啲,對住選後每一日嘅時事作對照,好似《高堡奇人》咁,寫一個平行時空小說。所以,我喺3月28日晚搞掂咗個Server,並且喺3月29日開始,頭五日喺我原本嘅facebook,同埋呢個小說專用website同步連載,到咗4月3日,呢本小說就獨立喺呢度自己連載,希望寫到7月3日,涵蓋到七一大遊行之後。因為我本身缺乏政府工作經驗,有啲實務上嘅嘢,可能寫錯,或者唔似假如 曾俊華 上場後嘅作風,如有錯漏,請多多包涵。

同埋,要個夢延續落去,就要真係好似果句廣告口號咁講,要相信每一個人,更重要係, 曾俊華 唔只得果個 曾俊華 ,你都可以係 曾俊華 。

黃世澤
2017年3月29日,上環

相關facebook page:
https://www.facebook.com/ifjohnwereource/

發佈留言

發佈留言必須填寫的電子郵件地址不會公開。 必填欄位標示為 *