由 短暫的婚姻 睇香港電視製作嘅問題

喺ViuTV嘅《瑪嘉烈與大衛之綠豆》後，香港好耐無電視劇掀起討論熱潮，直至陳奕迅主演，莊梅岩編劇嘅《 短暫的婚姻 》播出，五集嘅劇，竟然跑出。因為香港一直唔習慣五集咁少嘅劇，呢個安排比較似歐陸同英國公共電視嘅安排。

短暫的婚姻 到綠豆嘅成功

HKTV確立咗香港必須跟隨英美潮流，投資大量金錢以電影規格拍電視劇嘅常規(德國依家都要，ARD同英國SkyTV德國分公司合資Babylon Berlin就係因為成本好貴，ZDF都唔可能成日有超勁嘅製作，都係一個字：錢 嘅問題)，但係香港電視劇本來另一個更大問題係文本，香港呢個地方本來文學沙漠嚟，電視台唔願意喺劇本做投資，肯買金庸同梁羽生嘅武俠小說已經係好彩，以前真係Soap Opera，仲可以容易大規模生產嘅劇本粗製濫造，依家啲人又有Netflix，又有Amazon Prime，全世界各地嘅劇，要BT有得睇都睇到，CCTVB仲維持依家嘅粗製濫造模式，除咗黎瑞剛同王雪紅兩件仆街立心摧毀香港文化，我諗唔到其他理由。

電視台嘅in-house編劇係唔可能製造大量具質素嘅文本，文學係無可能用工廠方式生產出嚟，用AI人工智慧都好難生產文學作品，至少未來五十年都未可能(難度不亞於搞個Matrix出嚟)，所以一係買現有文學文本，好似《瑪嘉烈與大衛之綠豆》就係買現成文本，當然ViuTV連南方舞廳本人都一併請返嚟，情況比較特別，一係好似呢次咁，係專登請個專業編劇嚟寫，莊梅岩喺舞台劇界係建立咗口碑，相信呢次一戰成名，會繼續有ViuTV請佢寫劇本。如果唔係土共想陰乾香港電台，香港電台係行德國，英國模式嘅牌照費制度，其實最有條件大買劇本，應該係香港電台至啱。

香港小說界近二十年嘅衰落，其實係一個好大嘅問題，中國興乜嘢網上小說，但有幾多文本係出得街，我真係好懷疑，台灣嘅文本係唔一定適合香港使用，特別香港嘅混亂語言環境，可能搞番好俾中聯辦旗下三中商搞死咗嘅書市，係復興香港電視市場嘅一大關鍵。