.
.
Dié tyd van die jaar kan ’n mens gewoonlik iemand wat vir die Absa Cape Epic oefen ’n myl ver sien. Die meeste van hulle lyk moeg en ondergewig, en dié wat die Epic vir die eerste keer ry, het boonop ’n bang kyk in die oë.
Die afgelope naweek het ek ’n klomp sulke gesigte by die Momentum Tankwa Trek, naby Ceres, gewaar, want hierdie drie dae lange marathon is bekend daarvoor dat ’n mens jou fiksheidsvlakke en stamina kom meet voor die grote wat in Maart plaasvind.
Reeds met die afklimslag van die vliegtuig wanneer jy daai Epic- en Cape Pioneer-tasse op die vervoerband in die aankomssaal sien, weet jy jy bevind jou in ernstige fietsrygeselskap. Die manne is maer en fiks en vasbeslote, hoewel daar darem ook ’n paar doodgewone pretsoekers (soos ek) is.
