.jpg)
អ្នកបុរីកីឡា តវ៉ានៅមុខផ្ទះលោកស្រី ស៊ុយ សុផាន នៅព្រឹកមិញ។ ហុង មិនា
ភ្នំពេញៈ ប្រជាពលរដ្ឋរស់នៅតំបន់បុរីកីឡា ១១ គ្រួសារ ដែលនៅសេសសល់មិនទាន់បានសំណង នៅព្រឹកថ្ងៃទី ១៧ ខែមករានេះ បានប្រមូលផ្ដុំគ្នាតវ៉ា នៅខាងមុខផ្ទះលោកស្រី ស៊ុយ សុផាន ប្រធានក្រុមហ៊ុនផានអ៊ីមិច ដើម្បីទារសំណងជាទឹកប្រាក់ប្រមាណ ២ ម៉ឺន ទៅ ២ ម៉ឺន ៥ ពាន់ដុល្លារ ជាថ្នូរនឹងការឈូសឆាយផ្ទះសំបែងរបស់ពួកគេកាលពីឆ្នាំ ២០១២ នៅក្នុងខណ្ឌ ៧ មករា។
អ្នកស្រី ង៉ូវ ណារី តំណាងសហគមន៍បុរីកីឡាបានលើកឡើងថា ក្រុមអ្នកស្រីចំនួន ១១ គ្រួសារដែលមិនទាន់ទទួលបានសំណង បាននាំគ្នាទៅទាមទារតវ៉ានៅខាងមុខផ្ទះ លោកស្រី ស៊ុយ សុផាន ប្រធានក្រុមហ៊ុនផានអ៊ីមិចនេះ ដើម្បីចចារសំណងប្រមាណ ២ ម៉ឺន ទៅ ២ ម៉ឺន ៥ ពាន់ដុល្លារ ជាថ្នូរនឹងការឈូសឆាយផ្ទះសំបែងរបស់ពួកគេ កាលពីឆ្នាំ ២០១២។
អ្នកស្រី បន្តថា កាលពីថ្ងៃទី ១៥ ខែមករានេះ អ្នកស្រីបានជួបចចារគ្នាជាមួយលោក លឹម សុភា អភិបាលខណ្ឌ ៧ មករា ម្ដងហើយ ប៉ុន្ដែលោកអភិបាលខណ្ឌ បានសុំផ្ដល់សំណងចំនួន ១៥.០០០ ដុល្លារទេ ដោយក្រុមអ្នកស្រីទាមទារ ២ ម៉ឺនដល់ ២៥.០០០ ដុល្លារអាមេរិក។
អ្នកស្រី បញ្ជាក់ថា៖ «ពួកខ្ញុំទាមទារប៉ុណ្ណឹង លោកអភិបាលខណ្ឌ ហាក់មិនមានយោបល់អ្វីបន្ថែមទេ ដោយគ្រាន់តែសុំឲ្យក្រុមខ្ញុំទទួលយកសំណង ដែលគាត់ផ្ដល់ឲ្យ និងសុំឲ្យឈប់ធ្វើការតវ៉ា។ ហើយខ្ញុំថា ខ្ញុំនឹងមិនឈប់ទេ បើនៅមិនទាន់ឲ្យសំណងខ្ញុំគ្រប់គ្រាន់»។
អ្នកស្រី បន្ថែមថា ក្រុមគាត់នៅប្រកាន់យកជំហរដដែលដោយសុំសំណងពី ២ ម៉ឺនទៅ ២ ម៉ឺន ៥ ពាន់ដុល្លារ ហើយថានឹងបន្តនាំគ្នាទៅតវ៉ានៅខាងមុខផ្ទះ លោកស្រី ស៊ុយ សុផាន ដើម្បីឲ្យក្រុមហ៊ុនពន្លឿនការដោះស្រាយជូនពលរដ្ឋដែលនៅសេសសល់ និងតបតាមការស្នើសុំនេះ។
រយៈពេល៧ឆ្នាំហើយ ពោល គឺចាប់ពីថ្ងៃទី៣ មករា ឆ្នាំ២០១២ មកអ្នកភូមិបុរីកីឡាដែលនៅសេសសល់ចំនួន ៣៨៤ គ្រួសារ ត្រូវបានក្រុមហ៊ុន ផាន អ៊ីម៉ិច និងអាជ្ញាធរក្រុងភ្នំពេញដាក់កម្លាំងសមត្ថកិច្ច និងសន្តិសុខក្រុមហ៊ុន ទៅឈូសឆាយផ្ទះរបស់ពួកគាត់។
អាជ្ញាធរបានដឹកអ្នកបុរីកីឡាខ្លះ យកទៅដាក់ទួលសំបូរ និងភ្នំបាត ដែលមានចម្ងាយប្រមាណ ៤០ គីឡូម៉ែត្រពីក្រុងភ្នំពេញ។ សព្វថ្ងៃមានអ្នកបុរីកីឡា ១១ គ្រួសារ នៅមិនទាន់ទទួលសំណងបន្តក្រាញរស់នៅបុរីកីឡា លើគំនរសំរាមក្រោមកៅស៊ូតង់ក្តៅ និងក្រោមជណ្ដើរអគារ ដើម្បីទាមទារឲ្យក្រុមហ៊ុន ផាន អ៊ីម៉ិច សង់អគារស្នាក់ ២ បន្ថែមទៀតតាមកិច្ចសន្យា៕
